Ano ang Pilates na Ehersisyo?
Gumagamit ang Pilates ng mabagal at sinasadyang mga galaw para malinang ang kontrol sa buong katawan, lalo na sa bandang gitna nito. Puwede itong gawin sa banig o gamit ang espesyal na kagamitan, at iangkop sa iba’t ibang antas ng karanasan.
Paano gumagana ang Pilates
Paraan ng pag-eehersisyo ang Pilates na nakasentro sa kontroladong galaw, tuloy-tuloy na paghinga at maingat na pagpoposisyon ng katawan. Sa halip na magmadali sa mga ulit ng ehersisyo, ituon ang pansin sa pakiramdam ng bawat galaw at panatilihing matatag ang iba pang bahagi ng katawan.
Sa maraming ehersisyo, sabay-sabay na pinapagana ang mga kalamnan sa paligid ng tiyan, likod, balakang at pelvis. Madalas tawaging core ang suportang ito sa gitna ng katawan, pero sinasanay din ng Pilates ang mga binti, braso at balikat bilang bahagi ng magkakaugnay na galaw ng buong katawan.
Ano ang maaaring gawin sa isang session
Maaaring kasama sa session sa banig ang pag-arko ng katawan, pag-abot, pag-ikot, pagbabalanse at paggalaw ng mga braso at binti habang kontrolado ang katawan. Maliit at banayad ang ilan sa mga galaw, habang mas malawak naman ang galaw ng iba o pinananatili ang posisyon ng katawan laban sa grabidad.
Gumagamit ang Pilates na may kagamitan ng mga spring, strap at gumagalaw na platform para magbigay ng suporta o resistance. Nagkakaiba ang mga ehersisyo at antas ng hirap depende sa instructor, programa at kakayahan ng bawat tao, kaya maaaring ibang-iba ang pakiramdam ng session kumpara sa mabilisang workout sa gym.
Mga pangunahing prinsipyo
Mahalagang bahagi ng Pilates ang paghinga, konsentrasyon, katumpakan at kontrol. Karaniwang layunin na gawin ang bawat ulit nang may malinaw na intensyon, sa halip na magparami hangga’t maaari.
Mas mahalaga ang tamang porma kaysa sa pagpapalaki o pagpapahirap ng galaw para magmukhang mas advanced. Maaaring mas angkop ang mas payak na bersyon na ginagawa nang may tuloy-tuloy na kontrol kaysa piliting palawakin ang galaw, bilisan ito o dagdagan ang resistance.
Paano iugnay ang Pilates sa pagtatala ng kinakain
Gumagamit pa rin ng enerhiya ang Pilates, pero nakadepende ang dami nito sa iyong katawan, haba at estilo ng session, tindi ng pagsisikap at dami ng pahinga. Tantiya lang ng enerhiyang nagamit sa ehersisyo ang maibibigay ng relo, makina o tracking app, kaya ituring ang numero bilang gabay at hindi eksaktong halaga.
Kapag itinatala ang Pilates, piliin ang pinakamalapit na paglalarawan ng aktibidad at itala ang aktuwal na tagal ng session, hindi ang oras sa pagpunta roon, paghahanda ng gamit o pagpapahinga pagkatapos. Gamitin ang parehong paraan sa bawat session para mas madaling maikumpara ang tala ng iyong pagkain at aktibidad sa paglipas ng panahon.